តាកែវ: យុវជនម្នាក់ ត្រូវបានសមត្ថកិច្ចនគរបាលឃាត់ខ្លួន កសាងសំណុំរឿង បញ្ជូនទៅតុលាការ កាលពីថ្ងៃទី២៩ ខែមករា ឆ្នាំ២០១៥ ដោយយុវជននោះ ជាប់ចោទ ថាបាននាំកូនក្រមុំចេញដោយមិនស្របច្បាប់ កាលពីថ្ងៃទី២៣ ខែមករា ឆ្នាំ២០១៥ យកទៅរួមភេទនៅផ្ទះសំណាក់ នៅភ្នំពេញ។ យុវជនជាប់ចោទ ត្រូវបាននគរបាលឃាត់ខ្លួន កាលពីថ្ងៃទី២៧ ខែមករា ឆ្នាំ២០១៥ តាមពាក្យបណ្ដឹងឳពុកម្ដាយខាងកូនក្រមុំ។
លោក ឆុក អេងលី អធិការក្រុងដូនកែវបានអោយដឹងថា យុវជនជាប់ចោទឈ្មោះ នួន សីហា អាយ២១ឆ្នាំ រស់នៅភូមិព្រៃព្រហ្ម សង្កាត់រការក្នុង ក្រុងដូនកែវ ខេត្តតាកែវ ចំណែកកូនក្រមុំរងគ្រោះឈ្មោះ ខេម ធីតា អាយុ១៥ឆ្នាំ រស់នភូមិចក ឃុំត្រពាំងសាប ស្រុកបាទី ខេត្តតាកែវ។ ស្ត្រីឈ្មោះ ផាន់ ស្រស់ បាននិយាយប្រាប់នគរបាលថា ឈ្មោះ នួន សីហា បានលួងលោមកូនស្រីគាត់មិនទាន់គ្រប់អាយុ យកទៅរំលោភអស់រយៈពេល ៤ថ្ងៃ ព្រមទាំងអោយកូនស្រីគាត់ដោះគ្រឿងផ្លាកទីន លក់យកលុយដើរស៊ីផឹកទៀតផង ។ ដូច្នេះគាត់សូមប្ដឹងទាមទារលុយសងជំងឺចិត្តចំនួន៣០លានរៀល និងអោយច្បាប់ដាក់ទោសបន្ថែមទៀតផង។
ចំណែកកូនស្រីរងគ្រោះ បាននិយាយប្រាប់ប៉ូលិសថា យុវជនឈ្មោះ នួន សីហា បាននាំរូបនាងទៅចូលខ្លឹប ហើយនាំនាងទៅដេកផ្ទះសំណាក់ រួចចាប់រំលោភរូបនាងក្នុងមួយយប់មួយដងទៀតផង។ នៅក្នុងរយៈពេល ៤យប់ រូបនាងនិងយុវជននោះដេកនៅផ្ទះភ្នំពេញ ៣យប់ និងដេកផ្ទះយុវជនសីហាមួយយប់។
យុវជនជាប់ចោទបានសារភាពថា រូបគេពិតជាបាននាំក្មេងស្រីខាងលើទៅដើរលេង ហើយនាំចូលផ្ទះសំណាក់ដេកជាមួយគ្នាពិតប្រាកដមែន ព្រោះរូបគេនិងក្មេងស្រីនោះស្រលាញ់គ្នា។
ក្នុងករណីនេះ ម្ដាយរបស់យុវជនជាប់ចោទបានសំណូមពរសមត្ថកិច្ចគ្រប់ជាន់ថ្នាក់ មេត្តាកុំដាក់ទោសដល់កូនគាត់អី ព្រោះកូនប្រុសគាត់នៅកំលោះ ឯកូនស្រីក៏នៅក្រមុំ ដូច្នេះសុំអោយថ្នាក់លើជួយផ្សំផ្គុំរៀបការជាប្តីប្រពន្ធទៅ ពីព្រោះថា គាត់មានជីវភាពក្រីក្រណាស់អត់លុយចំនួន ៣០ លានរៀល បង់អោយទេ៕H/N
