ផ្កាកុលាបគឺជាផ្កាមួយប្រភេទដែលពេញនិយមបំផុតសម្រាប់សង្គម ហើយត្រូវបានគេយកទៅប្រើប្រាស់សម្រាប់លំអនៅក្នុងកម្មវិធីផ្សេងៗ។ តើអ្នកដឹងទេថាពណ៌ផ្កាកុលាប សុទ្ធតែមានអត្ថន័យខុសៗគ្នាដែរទេ? ជាញឹកញយពណ៌ផ្កាកុលាបត្រូវបានគេមើលរំលង នៅពេលដែលជូនផ្កាជាច្រើនទៅឲ្យអ្នកពិសេសរបស់ខ្លួន។ ទោះបីជាយ៉ាងណាក៏ដោយ អត្ថន័យធម្មតាសម្រាប់ផ្កាកុលាបគឺបញ្ជាក់ពីសេចក្តីស្នេហា តែពណ៌របស់ផ្កាកុលាបនីមួយៗក៏មានអត្ថន័យផ្សេងៗគ្នាដែរ។ នៅថ្ងៃនៃសេចក្តីស្រលាញ់ ផ្កាកុលាបត្រូវបានគេតុបតែងដើម្បីជូនទៅដល់អ្នកជាទីស្រលាញ់។ នៅពេលជ្រើសរើសផ្កាកុលាបសម្រាប់មនុស្សពិសេស អ្នកត្រូវជ្រើសពណ៌កុលាបណាដែលមានអត្ថន័យពិសេសសម្រាប់គេ។ នេះជាតារាងនៃពណ៌ផ្កាកុលាប និងអត្ថន័យនៃពណ៌ផ្កាកុលាបដែលអាចជួយអ្នកឲ្យបានយល់ច្បាស់ពីអត្ថន័យនៃផ្កាកុលាប។
កុលាបពណ៌ក្រហម : បញ្ជាក់ពីក្តីស្រលាញ់និងការគោរពគ្នាទៅវិញទៅមក។ ការផ្ញើសារជារូបផ្កាកុលាបក្រហមអាចជំនួសដោយពាក្យថា "បងស្រលាញ់អូន"។
កុលាបពណ៌ផ្កាឈូកចាស់: បញ្ជាក់ពីការឲ្យតម្លៃ និងការដឹងគុណ។ ការផ្ញើសារជារូបកុលាបពណ៌ផ្កាឈូកចាស់អាចជំនួសដោយពាក្យថា "អរគុណ"។
កុលាបពណ៌ផ្កាឈូកស្រាល: ការសរសើរ និងការព្រួយបារម្ភ។ ការផ្ញើសារជារូបកុលាបពណ៌ផ្កាឈូកស្រាលនេះបង្ហាញពីសម្រស់ និងភាពទាក់ទាញ។
កុលាបលឿង: បញ្ជាក់ពីសុភមង្គល និងមិត្តភាព ដើម្បីអបអរសាទរនូវសេចក្តីស្រលាញ់ដល់មិត្តណាម្នាក់ក្នុងឱកាសដ៏រីករាយណាមួយ។
កុលាបស: បង្ហាញពីភាពធ្វើខុសដោយគ្មានចេតនា ភាពបរិសុទ្ធ ដើម្បីគោរព អនុស្សាវរីយ៏ ដើម្បីបង្ហាញពីភាពបរិសុទ្ធនៅក្នុងឱកាសពិសេសណាមួយ។
កុលាបពណ៌ស្វាយ: បញ្ជាក់ពីភាពសប្បាយរីករាយនិងការចាប់អារម្មណ៏ក្រៃលែង ។ កុលាបពណ៌ស្វាយនេះមានអត្ថន័យទូលំទូលាយប្រើសម្រាប់ភាពសប្បាយរីករាយក្នុងអារម្មណ៍រំភើបជាលើកទី ១។ កុលាបនេះគេមានការពេញនិយមសម្រាប់ថ្ងៃបុណ្យនៃសេចក្តីស្រលាញ់។
កុលាបពណ៌ទឹកក្រូច: ការស្ងើចសរសើរ និងការធ្វើឲ្យចាប់អារម្មណ៏ ដើម្បីបង្ហាញពីមិត្តភាពថ្មី។
អត្ថន័យនៃចំនួនផ្កាកុលាប៖
កុលាប ១ ទង: ស្នេហាគ្រាដំបូង
កុលាប ២ ទង: ស្នេហាដែលស្រលាញ់គ្នាទៅវិញទៅមក
កុលាប ៣ ទង: បងស្រលាញ់អូន
កុលាប ៦ ទង: បងស៊ូស្លាប់ដើម្បីអូន, បងចង់ក្លាយជារបស់អូន
កុលាប ៧ ទង: បងចង់ឲ្យអូនទទួលយកសេចក្តីស្រលាញ់ពីបង
កុលាប ៩ ទង: ស្រលាញ់ជារៀងរហូត
កុលាប ១០ ទង: អូនជាមនុស្សល្អបំផុតសម្រាប់ជីវិតបង
កុលាប ១១ ទង:អូនជាមនុស្សម្នាក់សំខាន់បំផុតនៅក្នុងជីវិតបង
កុលាប ១២ ទង: សុំអូនធ្វើជាសង្សារ
កុលាប ១៣ ទង: មិត្តភក្តិសម្ងាត់
កុលាប ១៥ ទង: បងពិតជាសុំទោស សូមលើកលែងទោសឲ្យបងផង
កុលាប ២០ ទង: បងចាប់អារម្មណ៍នឹងអូនខ្លាំងណាស់
កុលាប ២៤ ទង: មិនអាចយកអូនចេញពីចិត្តបងបានឡើយ
កុលាប ៣៣ ទង: បងស្រលាញ់អូនខ្លាំងណាស់
កុលាប ៣៦ ទង: បងនឹងពេញចិត្តគ្រាស្នេហារ៉ូមែនទិចរបស់យើងទាំងពីរ
កុលាប ៤០ ទង: ស្រលាញ់គ្មានថ្ងៃប្រែ
កុលាប ៥០ ទង: ស្រលាញ់មិនស្តាយក្រោយ
កុលាប ៩៩ ទង: បងនឹងស្រលាញ់អូនជារៀងរហូត
កុលាប ១០០ ទង: ខំប្រឹងតស៊ូដើម្បីអូន
កុលាប ១០១ ទង: អូនជាមនុស្សដែលបងស្រលាញ់តែម្នាក់គត់
កុលាប ១០៨ ទង: ព្រមរៀបការនឹងបងទៅ
កុលាប ៣៦៥ ទង: មិនអាចឈប់គិតពីអូនបានទេ
កុលាប ៩៩៩ ទង: ស្រលាញ់អូនគ្មានទីបញ្ចប់៕
ដោយ៖ ដារ៉ា