អ្នកខ្លះខ្លាចរអា មិនហានភ្លក់មិនហានប្រើ ហើយមានអ្នកខ្លះថា ប៊ីចេងជាឃាតក លាក់មុខទៀតផង។ ពីព្រោះពួកគេមានជំនឿ តៗគ្នាថា ពេលបរិភោគសារធាតុនេះទៅនឹងបង្កគ្រោះថ្នាក់ដល់សុខភាព។ បើសិនជាមានគ្រោះថ្នាក់មែន ហេតុអ្វីបានជាឧស្សាហកម្មនៅតែដំណើរការផលិតប៊ីចេងបាន ឬមួយជាទង្វើខុសច្បាប់ទេ? ប៊ីចេងត្រូវបានគេខ្លាចរអា ជាពិសេសសម្រាប់បណ្តាលជននៅអ៊ឺរ៉ុប និងអាមេរិច។ សម្រាប់ក្រសែរភ្នែកពូកគេ ការប្រើប្រាស់ប៊ីចេងដើម្បីផ្សំគ្រឿងនៅក្នុងចំណីអាហារនៅតំបន់អាស៊ី មានអ្នកខ្លះមិនហានចូលទទួលទានឡើយ ក៏ព្រោះតែខ្លាចសារធាតុប៊ីចេងនេះឯង។
ការបរិភោគអាហារដែលមានដាក់ប៊ីចេងច្រើនបានជាប់ចោទថា មានបង្កឲ្យមានអាការៈ ឈឺក្បាល ចង់ក្អួត រងាក់រងឺ និងបែកញើស ។ល។ តើប៊ីចេងពិតជាមានគ្រោះថ្នាក់ដល់សុខភាពមែន ឬយ៉ាងណា?
លោក ហៀត គីមហាង វិស្វករផ្នែកចំណីអាហារបាននិយាយថា នៅប៉ែកអ៊ឺរ៉ុបអ្នកដែលទទួលទានប៊ីចេងច្រើន ក្នុង ៥០០០នាក់ មានតែម្នាក់ដែលមានអាការៈឈឺ។ ប៉ុន្តែនៅប៉ែកអាស៊ីក្នុងចំណោមមនុស្ស ៥០០០០នាក់ មានតែម្នាក់ ដែលឈឺដោយសារប៊ីចេង។ នៅឧស្សាហកម្មចំណីអាហារមានកម្រិតដែលត្រូវដាក់នៅពេលចម្អិនអាហារ។ បើសិនជាអ្នកប្រើប្រាស់ប៊ីចេងឲ្យបានសមស្រប នោះអ្នកនឹងមិនមានបញ្ហាអ្វីឡើយ។
លោកវិជ្ជបណ្ឌិត ឡោ គីមសុង មានប្រសាសន៏ថា អ្នកដែលមានជំងឺលើសឈាម គឺជៀសវាងកុំឲ្យបរិភោគជាតិប្រៃលើសពី ៦ក្រាមក្នុង ១ថ្ងៃ។ អ្នកប្រហែលមិននឹកស្មានថា នៅក្នុងប៊ីចេង គឺមានសាធាតុប្រៃទេ។ ប៉ុន្តែគេបានយកប៊ីចេងទៅវាស់មើលឃើញថា មានសារធាតុ Chlorine និង Sodium ច្រើន ដែលបណ្តាលឲ្យមានសារធាតុប្រៃ។ ដូច្នេះដើម្បីថែរក្សាសុខភាពឲ្យបានល្អ អ្នកគួរកាត់បន្ថយ ឬក៏បញ្ឈប់ការប្រើប្រាស់ប៊ីចេងក៏បាន៕
ដោយ៖ យូរី
ប្រភព៖ បរទេស