ការចេះតុបតែរូបរាងខាងក្រៅនឹងជួយឲ្យអ្នកក្មេងជាងវ័យ និងមានភាពស្រស់ស្អាត ប្រសិនបើអ្នកអនុវត្តន៏បែបបទខាងក្រោម។ សក់របស់អ្នក គឺជាអាវុធជួយបិតបាំងស្លាកស្នាមលើផ្ទៃមុខ ហើយធ្វើឲ្យមុខមើលទៅមានរាងពងក្រពើ, ជួយលើកថ្ងាសឲ្យខ្ពស់, លាក់បាំងភាពជ្រីវជ្រួញនៅចុងកន្ទុយភ្នែក… មិនថាអ្នកមានសក់វែង ឬសក់ខ្លី ត្រង់ ឬរួញឡើយ អ្នកក៏គួរតែយកចិត្តទុកដាក់អនុវត្តន៏តាមការណែនាំធ្វើម៉ូដសក់ ដើម្បីជួយឲ្យរូបរាងអ្នកមើលទៅនៅវ័យក្មេង៖
កាត់សក់ច្រើនតង់
អ្នកធ្វើម៉ូដសក់ Boston បាននិយាយថា៖ ម៉ូដសក់ច្រើនតង់តែងតែសក្តិសមចំពោះមនុស្សស្រីភាគច្រើន ជួយឲ្យសក់ទន់ល្មើយ, រូបរាងទាន់សម័យ។ ការបួងសក់ឡើងលើ ហើយទម្លាក់សក់ចុះបន្តិចគ្របពីលើថ្ពាល់រហូតដល់ចង្ការអាចជួយឲ្យសក់អ្នកស្រស់ស្អាតតាមបែបធម្មជាតិ និងជួយបិតបាំងស្លាកស្នាមលើផ្ទៃមុខទាំងសងខាង។ នេះជាវិធីសាស្ត្រប្រសើរបំផុតជួយឲ្យសក់អ្នកក្រាស់ មានទម្ងន់។
កុំភ្លេចទុកសក់សេះ
សក់សេះធ្វើឲ្យអ្នកមានផ្ទៃមុខក្មេងជាងវ័យ ព្រោះវាមិនត្រឹមតែជួយបង្កើនភាពស្រស់ស្អាតប៉ុណ្ណោះទេ តែថែមទាំងជួយលើកថ្ងាសឲ្យបានខ្ពស់ ជួយលាក់បាំងភាពស្នាមជ្រីវជ្រួញ ឬមុនថែមទៀត។ ទោះបីជាយ៉ាងណាក៏ដោយ សក់សេះមិនសក្តិសមចំពោះមនុស្សស្រីគ្រប់គ្នាឡើយ អ្នកអាចទៅជួបនឹងអ្នកជំនាញ ដើម្បីសុំការណែនាំកាត់សក់ឲ្យសក្តិសម នឹងទម្រង់មុខរបស់អ្នក។
កុំធ្វើម៉ូដសក់ខ្លាំងពេក
សក់ខូច សរសៃសក់បែកចុងនឹងធ្វើឲ្យរូបរាងរបស់អ្នកចុះអន់ខ្សោយ ហើយចាស់។ ដើម្បីចៀសវាងស្ថានភាពបែបនេះ អ្នកគួរតែប្រើសារធាតុចិញ្ចឹមសក់ដូចជា៖ ប្រេងដូង, ប្រេងអូលីវ, ទឹកដោះគោជូរ…ព្រោះរបស់ទាំងអស់នេះនឹងជួយបង្កើនសំណើមដល់សក់, ជួយព្យាបាលសក់ខូចបានយ៉ាងរហ័ស។ ត្រូវចងចាំថា មិនត្រូវប្រើឡាមដើម្បីកាត់សក់ឡើយ ព្រោះបណ្តាលឲ្យសក់បែកចុង។
លាបថ្នាំសក់
សក់ពណ៌ធម្មជាតិរបស់អ្នកមានភាពស្រស់ស្អាត និងមានភាពទាក់ទាញ ប៉ុន្តែការអនុវត្តន៏តាមបច្ចេកវិទ្យានឹងអាចជួយឲ្យស្តាយ៏ម៉ូដសក់របស់អ្នកកាន់តែទាន់សម័យ ជួយឲ្យមុខស្អាត ភ្លឺរលោង។ បច្ចុប្បន្ននេះមនុស្សស្រីចូលចិត្តលាបថ្នាំសក់ពណ៌មង្ឃុត, ពណ៌ទង់ដែង, ពណ៌ក្រហម។ ហើយអ្នកក៏អាចអានការណែនាំខាងក្រោម ដើម្បីជ្រើសរើសប្រភេទថ្នាំលាបសក់ដែលសក្តិសម៖
ស្បែកស: មនុស្សស្រីមានស្បែកស គួរលាបថ្នាំសក់ពណ៌មង្ឃុត, ពណ៌ទង់ដែង, ក្រហម, ស្វាយ ព្រោះវាធ្វើឲ្យមើលទៅមានភាបក្មេងជាងវ័យ។ តែត្រូវចៀសវាងលាបថ្នាំសក់ពណ៌ស្កូវ ព្រោះវាធ្វើស្បែកអ្នកមើលទៅកាន់តែស្លេកស្លាំង។
ស្បែកពណ៌មាស: លាបថ្នាំសក់ទង់ដែង, ស្វាយ និងពណ៌ត្នោតពិតជាសក្តិសមនឹងអ្នកមានស្បែកពណ៌នេះ។
ស្បែកពណ៌ទឹកឃ្មុំ: គួរប្រើថ្នាំសក់ពណ៌លឿង, ពណ៌ត្នោតភ្លឺ, ពណ៌ទង់ដែង។ កុំលាបសក់ពណ៌ខ្មៅ ព្រោះវាកាន់តែធ្វើរូបរាងអ្នកកាន់តែខ្មៅ៕
ដោយ៖ ដារ៉ា